Басты бет » Әлеумет » Кім қашан зейнетке шығады?

Кім қашан зейнетке шығады?

Зейнетақымен қамсыздандыру жүйесіне енгізілетін өзгерістердің бірі — әйелдердің зейнеткерлікке шығу жасының ұлғайтылуы.

«Қазақстан Республикасындағы зейнетақымен қамсыздандыру туралы» ҚР Заңына сәйкес 2001 жылдан бастап елімізде ер адамдардың зейнет жасы — 63 жас, әйел адамдардың зейнет жасы 58 жас болып белгіленген еді. 2018 жылдың 1 қаңтарынан бастап енгізілетін өзгерістер бойынша, әйел адамдардың зейнет жасы 63 жасқа ұлғайтылып отыр. Бұл 2018 жылдан 2027 жылға дейінгі аралықта, яғни 10 жыл бойы бірте-бірте жүзеге асырылады. Әр жылы зейнет жасына 6 ай мерзімнен қосылып отырады. Мысалы, 1960 жылдың 1 қаңтарында дүниеге келген әйелдер зейнетке 2018 жылдың 1 шілдесінен, яғни 58,5 жасқа толғаннан бастап шығады. Тек 1960 жылдың 1 қаңтары мен 30 маусымы аралығында дүниеге келгендер ғана 58,5 жаста зейнеткерлікке шыға алады. Ал туған күні 1960 жылдың 1 шілдесі болса, онда 59 жасқа толған күннен бастап шығады. Өйткені 2019 жылдың 1 қаңтарынан бастап әйелдер үшін зейнет жасы 59 жасқа ұлғайтылады. Осылайша бірте-бірте ұлғайту арқылы 2027 жылдың 1 қаңтарынан бастап әйелдердің зейнет жасы 63 жас болып белгіленбек.

Зейнет жасының бірте-бірте ұлғайтылуы, бір жағынан, макроэкономикалық талаптарға байланысты болса, екінші жағынан, 1998 жылдың 1 қаңтарынан бергі, яғни жинақтаушы зейнетақы жүйесіндегі еңбек өтілін көбейту қажеттілігімен байланысты болып отыр.

Сондай-ақ, мына жағдайларда әйелдер зейнеткерлікке ерте шыға алады:

— «Семей ядролық сынақ полигонындағы ядролық жарылыстар салдарынан зардап шеккен азаматтарды әлеуметтік қорғау туралы» ҚР Заңына сәйкес, 1949 жылдың 29 тамызы мен 1963 жылдың 5 шілдесі аралығында өте жоғары радиациялық қауіп аумағында кемінде 5 жыл өмір сүрген әйел адамдар 45 жастан бастап;

— 5 және одан да көп бала туған (асырап алған) және оларды кемінде 8 жасқа дейін тәрбиелеп-өсірген әйелдер 53 жастан бастап шығады.

 А.МҰХИТОВ,

Ақтөбе облысы бойынша еңбек,

әлеуметтік қорғау және көші-қон департаментінің бас маманы.

Бір пікір

  1. Сәлеметсіз бе? Менің анар 1961 жылы қаңтарда туылған, сонда қай жылы зейнетақыға шығады?

Пікір жазу

Your email address will not be published. Толтырылуы міндетті жерлер белгіленген *

*